उदयपुर – उदयपुरमा विद्यार्थी बोकेको स्कुल बस दुर्घटना हुँदा एक जनाको मृत्यु भएको छ भने ३९ जना घाइते भएका छन्।
त्रियुगा नगरपालिका– ५ देउरीमा रहेको अन्नपूर्ण सेकेन्डरी स्कुलका विद्यार्थी बोकेको बस शनिबार दुर्घटनामा परेको हो।
मदन भण्डारी लोकमार्गको उदयपुरगढी गाउँपालिका– ७ जोगीटोल अँधेरी खण्डमा प्र १०५००१ ख ००४४ नम्वरको बस दुर्घटना हुँदा चालक भिखन चौधरीको मृत्यु भएको जिल्ला प्रहरी कार्यालय उदयपुरका सूचना अधिकारी तथा प्रहरी नायव उपरीक्षक हरिन्नद चौधरीले बताए।
चौधरीका अनुसार दुर्घटनास्थलबाट उद्धार गरी घाइतेहरुलाई जिल्ला अस्पताल गाईघाट ल्याइएको छ। उनले भने, ‘मृतक बस चालक र घाइतेको विवरण संकलन भइरहेको छ, हामीले दुर्घटनागस्त स्थानबाट उद्धार गरी ल्याएका छौँ।’
प्रनाउ चौधरीले थप विवरण संकलन भइरहेकाले हालसम्म एकजनाको मात्र मृत्यु पुष्टि भएको बताउँदै भने, ‘बस के कति कारणले दुर्घटना भयो ? त्यसको अनुसन्धान सुरु भएको छ।’
