चितवन – सामाजिक सञ्जालमा नाबालिकाको तस्वीरको दुरुपयोग गरी चरित्रहत्या गरेको आरोपमा एक किशोर पक्राउ परेका छन् ।
साइबर ब्यूरोबाट खटिएको प्रहरी टोलीले नक्कली फेसबुक आईडी बनाएर चरित्रहत्या गरेको आरोपमा सङ्खुवासभा चैनपुर स्थायी घर भई हाल ललितपुर इमाडोल बस्दै आएका १८ वर्षीय अनिश भट्टराईलाई पक्राउ गरेको हो ।
प्रहरीका अनुसार आरोपी किशाेरले सबैभन्दा पहिले नाबालिकाकाे नाममा नक्कली आईडी बनाई अश्लील तस्वीरमा नाबालिकाको टाउकाे जाेडी अपलाेड गरेका थिए । त्यसपछि पीडित नाबालिकाको आफन्त तथा साथीहरूलाई उक्त तस्वीर पठाएर अश्लील कमेन्टसमेत लेखेर चरित्रहत्या गरे ।
यसपछि पीडित पक्षले अनुसन्धान तथा कारवाहीको साइबर ब्यूरोमा लागि निवेदन दिएको थियो । त्यसैको आधारमा अनुसन्धान तथा प्राविधिक विश्लेषण गर्दा भट्टराई पक्राउ परेका हुन् ।
भट्टराईमाथि थप अनुसन्धान भइरहेकाे प्रहरीले जनाएकाे छ ।
