डेंगी रोगको संक्रमणबाट १ जनाको मृत्यु

झापा –  झापाको बिर्तामोडमा डेंगी रोगको संक्रमणबाट थप एक जनाको मृत्यु भएको छ । डेंगी संक्रमणबाट बिर्तामोड नगरपालिका-५ निवासी ४४ वर्षीय बिचन्द्र लावतीको मृत्यु भएको हो ।

लावतीको शुक्रबार साँझ उपचारको क्रममा मृत्यु भएको बताइएको छ। बिर्तामोडस्थित बीएण्डसी हस्पिटलको आइसियु भेन्टिलेटरमा राखेर उनको केही दिनदेखि उपचार भइरहेको थियो ।

साउनको पहिलो साता बिर्तामोड नगरपालिका–५ की ४४ वर्षीया मदिना खातुनको डेंगी  संक्रमणबाट मृत्यु भएको थियो । डेंगी पुष्टि भएको भोलिपल्ट उनको घरमै मृत्यु भएको परिवारले जनाएको छ । जिल्ला स्वास्थ्य कार्यालय झापाले दुई दिनअघि निकालेको तथ्याङ्कमा जिल्लामा २३८ जना डेंगी संक्रमित पुगेको जनाएको छ । तर, बिर्तामोडकै अस्पतालहरूमा सयभन्दा बढी डेंगी संक्रमित उपचार गराइसकेका छन् ।